Lucia lacarra: әлемдік балеттің супержұлдызы алғаш рет Алматы қаласында!
Халықаралық Ballet Globe фестивалі мен Алматы Театр ұсынады:
1-2 қараша күндері Алматыда мәдени қауым көптен күткен айтулы іс-шара өтпек. Қазақстанның мәдени астанасында алғаш рет испандық балет жұлдызы, «балеттегі Оскар» атанған Benois de la Danse сыйлығының иегері, Нижинский жүлдесінің лауреаты, «Онжылдықтың бишісі» атағына ие Люсия Лакарра өнер көрсетеді.
Оның серіктесі әрі хореографы - Ковент-Гарден Корольдік театрының премьеры Мэттью Голдинг, сондай-ақ Lucia Lacarra Ballet труппасының 12 әртісі.
«Lost Letters» («Жоғалған хаттар») балеті - шынайы оқиғаға негізделген қойылым. Қиын кезеңде ағылшын сарбазы Фрэнк Брейси сүйікті жарына хат жазады. Ол әйелін «жер бетіндегі ең жақсы қызым» деп атап, әр жолы үшін алғыс айтып, махаббаты жүрегін қалай жылытып жүргенін баяндайды. Бірақ хаттың ар жағында - қоштасудың алдын ала сезімі. Ол үйге оралмауы мүмкін екенін түсінеді.
Сарбаздың соңғы өтініші - жарына өмірді жалғастыруға, бақыт табуға, бір күні қайтадан сүйе білуге күш табу. «Жүрегіңде махаббатымызды сақта, бірақ жалғыздыққа қамалма», - деп жазады ол. Ал егер бұл хат өз иесіне жетпесе ше? Осы сұрақ балеттің өзегіне айналды. «Lost Letters» - қоштасу сәтінде қаламға іліккен миллиондаған хаттарға арналған хореографиялық естелік, жүректерді жалғап, соңғы сөзге айналған жолдар жайлы қойылым.
Сахнада сенім мен үмітке, қасірет пен жарқын естелікке толы нәзік тарих өрбиді. Музыка мен пластика балетті жанды күнделікке айналдырады: сағыныш, үміт, жоғалту мен мәңгілік естелік бірінен соң бірі сырғып өтеді.
Люсия Лакарра - Сумаия қаласының тумасы, әлемдік сахналарды бағындырған би өнерінің символы. Сан-Франциско, Мюнхен, Дортмунд, Марсель сахналарында жарқыраған оның өнері ең жоғары марапаттарға ие болды. Әр рөлі - шынайы сыр, ал «Lost Letters» қойылымында оның қимылы нәзік те қайсар әйел жанының бейнесіне айналады.
Мэттью Голдинг - Канададан шыққан, Корольдік балет мектебінің түлегі, Нидерланд Ұлттық балетінің премьеры және Корольдік балеттің жетекші солисі болған. Мариин театрында, English National Ballet және Канада Ұлттық балетінде өнер көрсеткен. Dutch Zwaan Award жүлдесінің иегері, Benois de la Danse номинанты. Бүгінде ол тек сахнада ғана емес, авторлық қойылымдарымен де танымал. «Lost Letters» арқылы ол сүйіспеншілік пен қоштасу жайлы сахналық поэма жасайды.
Lucia Lacarra Ballet труппасының 12 әртісі жеке тағдырларын ортақ әңгімеге тоғыстырып, сахнаны тұтас бір көркем туындыға айналдырады.
«Lost Letters» - әркімнің жүрегіне жол табатын балет. Ол бізге қымбат жандарды еске салады, естелік, адалдық және жоғалған хаттардың да жүрекке жететін күші сияқты ең асыл заттарды қайтадан ойға әкеледі.
