«Өнерлі әулет өрнегі» Касымбековтер шығармашылық әулетінің көрмесі

2025 жылғы 9 шілдеде сағат 16:00-де Әбілхан Қастеев атындағы Қазақстан Республикасының Мемлекеттік өнер музейінде Касымбековтер шығармашылық әулетінің өнеріне арналған «Өнерлі әулет өрнегі» атты көрменің салтанатты ашылуы өтеді.

«Өнерлі әулет өрнегі» көрмесі - Қазақстандағы ең жарқын шығармашылық әулеттердің бірі - Касымбековтер отбасына арналған бірегей мәдени шара. Көрме ұрпақтар сабақтастығын терең ашып көрсетеді, мұнда өнер тек өмірлік іс қана емес, сонымен қатар аға буыннан кейінгі ұрпаққа беріліп келе жатқан мәдени мұраның өзегі болып табылады.

Касымбековтер әулетінің түп тамыры табиғат пен тарих, ұлттық рух пен тірі шығармашылық тоғысқан Жетісу (Жоңғар) Алатауының етегіндегі қасиетті Талды жерінде бастау алады. Аңыздар мен петроглифтерге, арасандар мен ежелгі өркениеттер іздеріне бай бұл мекен әулетке ерекше дүниетаным, еңбекқорлық, төзімділік және нәзік көркем талғам сыйлады.

Экспозицияда қолданбалы өнер, мүсін, зергерлік және көркем-техникалық дизайн саласындағы туындылар ұсынылған. Әулет мүшелерінің жұмыстары шеберліктің жоғары деңгейімен, техника алуан түрлілігімен және материалға деген терең құрметімен ерекшеленеді. Көрермендер көркемдік тілдің дамуын, авторлық даралықты және әрбір жұмыстан көрініс табатын әулеттік сабақтастықты тамашалай алады.

Экспозицияда ерекше орын Болат Касымбековтың шығармашылығына берілген. Оның ерте және жаңа кезеңдегі жұмыстары ұсынылады: «Қорқыт» (2013), «Абыз ата» (қола, 2012), «Алма ұстаған бала» (гипс, 2012), «Абай Құнанбайұлы» (гипс, 2019), «Дінмұхамед Қонаев» (гипс, 2020), «Шахмат фигуралары» (қола, 2023-2024), сондай-ақ жаңа туынды - «Қола» (2024-2025).

Бөлек бөлімде Алматы, Ұзынағаш, Жаркент және Маңғыстау өңірлерінде орнатылған монументалды шығармалардың фотоматериалдары ұсынылған: «Елтинді батыр» (2006), «Шоқан Уәлиханов» (2008), «С. Нұрмағамбетов» (2013), «Багай батыр» (гранит, 2004) және т.б.

Көрмеге әулеттің бірнеше буын өкілдері - соғыс ардагері, суретші әрі өнертапқыш Ахметқали Касымбековтен бастап, оның балалары Болат, Манарбек, Жанаргүл, Бегайым, немерелері Айғаным Дулатқызы, Гүлмира Аппасова, Назерке Манарбекқызы, Ілияс Слямғазы, Өркен Касымбеков, Әдемі Нұртілеу және шөберелері Хамза Дулатұлы мен Ален Избасаровқа дейін қатысады.

«Өнерлі әулет өрнегі» - бұл көркем отбасының тірі шежіресі, тек шығармашылық жетістіктердің ғана емес, сондай-ақ отбасы дәстүрлерінің, рухани құндылықтар мен өнерге деген сүйіспеншіліктің көрінісі. Көрме мәдени сабақтастықтың маңыздылығын еске салып, ұлттық көркем мұраны сақтау мен дамытуға шабыттандырады.