Джурден мырза-барқыттағы бос орын
Мольердің әйгілі пьесасы негізінде заманауи көзқараспен қайта жасалған комедия. Сатира мен жеңіл иронияға толы бұл спектакль кейіпкерінің өзі сияқты сырттай жылтырап, ішкі әлемінде бос кеңістікті жасырып тұрғандай әсер қалдырады.
Журден - өзін үнемі жетілдіруге ұмтылатын, қазіргісінен биік болғысы келетін адам. Ол сыртқы көріністі өзгертіп, қымбат киім, мойындау мен абырой сатып алғанмен, жан дүниесіндегі бос орынды ештеңемен толтыра алмайды. Оның әрекеті кейде күлкілі, кейде аянышты, бірде өзіне сенімді, бірде дал болып қалады - дәл осы күйі көрерменге таныс әрі шынайы көрінеді. Журден - жай ғана атақ іздеген буржуа емес. Ол - арманшыл, іштей бақытты аңсайтын жан. Өзінің шынайы еместігін сезсе де, өмір атты спектакльдегі рөлін ойнауды жалғастырады. Себебі, шынайы өмірдің қаталдығынан гөрі, алдамшы иллюзияда өмір сүру оңайырақ. Оның айналасындағы ұстаздары мен туыстары да бұл алдамшы әлемді шындықтай қабылдауға дайын. Ал Журденнің өзі бәрін түсінсе де, осы жалған өмірдің шырмауынан шыққысы келмейді. Өйткені әлсіз болса да, сол елес оған өмірдің ләззатын сездіреді.
Қойылымды Қазан қаласынан келген белгілі режиссёр Туфан Имамутдинов сахналаған. Спектакль жеңіл юмормен, музыкалық және визуалды шешімдермен, қазіргі заманға сай мәнермен ерекшеленеді. Бірақ күлкілі көріністердің астарында - шындықпен бетпе-бет келуге жүрегі дауаламай, қиял әлемін таңдаған адамның терең драмасы жатыр.
