САРЫ ДАЛА

2025 жылғы 22 қараша күні Е.Рахмадиев атындағы Мемлекеттік академиялық филармонияның камералық залында әсерлі де мазмұнды «САРЫ ДАЛА» ән кеші өтеді. Концерт сағат 17:00-де басталып, көрерменге кең дала сарыны мен қазақы рухтың әуезін тоғыстырған ерекше бағдарлама ұсынылмақ.

Кеш барысында қазақ музыкасының әр дәуірін қамтитын туындылар орындалатын болады. Концерттің алғашқы нөмірі Кентау Назарбектің сөзі мен әніне жазылған «Сыйласқанға не жетеді» әнімен ашылмақ. Бұдан кейін «Сары дала» тобы Жанай Әбдірахманның «Туған жер», Қанат Боханның «Баркөл», Теміржан Базарбаевтың «Тамаша» сияқты әсерлі әндерін орындайды.

Кешке белгілі дәстүрлі әншілер де қатысады. Зинат Қасымова Шәмші Қалдаяқовтың «Арайлым Ақкелес» әнін, ал Тельман Нұркенов Түгелбай Қазақовтың «Жаңбыр төкті» және Құрман Әкбарияның «Ақ көйлек» әндерін орындайтын болады. Сондай-ақ Жақсыкелді Маясаров Теміржан Базарбаевтың «Атың кім, қалқа» әнін көрерменге ұсынады.

Бағдарламада қазақ музыкасының алтын қорына енген туындылар да шырқалмақ: Ескендір Хасанғалиевтың «Бозторғай», Шәмші Қалдаяқовтың «Сен сұлу», Әбілахат Еспаевтың «Маржан қыз» сияқты әндер көрермен жүрегін елжіретпек.

Кештің екінші бөлімі халық әндеріне арналмақ. «Сары дала» тобы «Шырмауық», «Тау ішінде», «Қарғаш-ай», «Бүлдірген» сынды халық әндерін орындайды. Сондай-ақ Сәулежан Тағзия «Ауылым алтын бесігім» және «Ақ ерке» әндерін шырқап, кешті көркем түйіндейтін болады.

Кештің көркемдік жетекшісі – Секен Сыздықов.

«Сары дала» тобының мүшелері  - Берік Омаров, Данияр Мұқан, Ершат Қайырхан, Рахат Бегасылов