«Астана» эстрадалық-симфониялық оркестрінің және Қазақстан Композиторлар Одағының концерті

2025 жылғы 26 қыркүйек күні сағат 19:30-да «Жастар» сарайында «Астана» эстрада-симфониялық оркестрінің Қазақстан Композиторлар одағымен бірлескен концерті өтеді. Бұл кеште ұлттық және кәсіби композиторлық өнердің үздік үлгілері ұсынылып, қазақ музыкасының бай мұрасы мен заманауи туындылары тоғысады.

 

Бағдарлама аясында халық әндері мен күйлері, Құрманғазы Сағырбайұлы, Бапіш, Ыбрай Дүкенұлы, Жаяу Мұса сынды халық композиторларының шығармалары және Ахмет Жұбанов, Нұрғиса Тілендиев, Шәмші Қалдаяқов, Кеңес Дүйсекеев, Төлеген Мұхамеджанов, Балнұр Қыдырбек бастаған кәсіби композиторлардың туындылары орындалады. Тыңдармандарға А.Бестыбаевтың «Шествие тюрков», Құрманғазының «Адай» күйі, Еділ Құсайыновтың «Махамбет – мұнар күн», Балнұр Қыдырбектің «Казахстанский час», Кеңес Дүйсекеевтің «Сәлем, саған туған ел», Төлеген Мұхамеджановтың «Құс жолы» сынды шығармалар ұсынылады.

 

Кешке Қазақстан Республикасының Еңбек сіңірген қайраткері, композитор әрі мультиинструменталист Еділ Құсайынов, республикалық және халықаралық байқаулардың лауреаттары Зарина Божақова, Дәурен Төлебаев, Жексембай Арман, «Дарын» мемлекеттік жастар сыйлығының иегері Алибек Альмадиев, «Құрмет» орденінің иегері Нұргүл Сапарова қатысады. «Мәдениет саласының үздігі» - Сауле Туякова.

 

Оркестрдің көркемдік жетекшісі – ҚР «Мәдениет саласының үздігі» Ержан Исин, бас дирижері – ҚР «Мәдениет саласының үздігі» Фархад Қасым, ал дирижері – ҚР Еңбек сіңірген қайраткері Әліби Абдинұров.

 

Бұл концерт ұлттық өнерді дәріптеп қана қоймай, қазіргі заманғы композиторлық шығармашылықтың кең тынысын көрсететін маңызды мәдени оқиға болмақ.