ОРТЕКЕ

Ортеке - қазақ халқының көне дәуірден жеткен асыл мұрасы әрі қайталанбас қуыршақ өнері. Ағаштан ойылған шағын теке домбыраның күйі төгілгенде жан біткендей шапқылап билеп кетеді.

Алматы Мемлекеттік қуыршақ театрының бұл спектаклінде аңызға айналған сал-серілер көрерменді қазақтың ғажайып ертегілері мен халық аңыздарына жетелеп, жүрекке әсер етер әуендерімен және ерекше Ортеке өнерімен тоғыстырады.

Домбыра, қобыз, сыбызғы және өзге де ұлттық музыкалық аспаптардың тірі үні сахна төрінде сиқырлы да әсерлі атмосфера қалыптастырып, ұлттық құндылықтарды дәріптеуге жол ашады. Ерекше қуыршақтардың қимылы да көрерменге қуыршақ өнерінің ғажайып сырын сезіндіреді.

«Ортеке» спектаклі - ұлттық рухты оятып, дәстүрдің құндылығын айшықтайтын айрықша туынды.