Интерленд – Интернет елі
Бүгінгі заманда Интернеттің ықпалынан тыс өмір сүретін адамды табу қиын. Әсіресе бұл өскелең ұрпаққа тән құбылыс: кейде балалар шынайы өмірді ұмытып, виртуалды әлемге сүңгіп кетеді.
Қойылымның басты кейіпкерлері - Атасы мен Балақай есімді немересі. Атасы немересін қолөнер, кітап оқу, түрлі ойындарға баулуға тырысады, алайда Балақайдың бар қызығушылығы гаджеттерге тақалған.
Бір күні ол кенеттен виртуалды әлемге түсіп қалады. Сол жерде ол көңілді Инстаграммен, Ютубпен және ТикТокпен танысады. Әуелде бәрі жақсы көрінген әлем шын мәнісінде тап бір тұзақтай болып шығады. Шығар жол жоқ сияқты, бірақ дәл сол сәтте Балақайдың есіне атасының «Өзіңе сену керек!» деген сөздері түседі.
Бұл спектакль жас көрерменге шынайы өмір мен виртуалды әлемнің арасынан алтын теңгерімді табуға, әрдайым өз болмысына адал болуға үйретеді.
