«Әлқисса» фольклор ансамблі

«Әлқисса» фольклорлық ансамблі шығармашылық жолының салыстырмалы түрде қысқа уақытында-ақ тек өз өңірінде ғана емес, одан тыс жерлерде де кеңінен танымал болды. Ансамбль Алматы қаласында өткен дәстүрлі музыкаға арналған «Ғасырлар сазы» республикалық фестиваль-байқауында дипломант атанды. Сол жылы ұжым Солтүстік Кипрде (Түркия) өткен фольклорлық музыка фестиваліне қатысып, кейін Франциядағы фольклор фестивалінде Қазақстан атынан өнер көрсетті. Сондай-ақ ансамбль Астана қаласында өткен ХVI Халықаралық шығармашыл жастар фестивалі «Шабытқа» қатысып, ІІ дәрежелі лауреат атағын иеленді.

«Әлқисса» ансамблі Солтүстік Қазақстан облысының аудандарында, Алматы мен Астана қалаларында, сондай-ақ Ресей Федерациясының Салехард қаласында гастрольдік сапармен өнер көрсетті. Ансамбль репертуарында халықтық мұраға негізделген көптеген шығармалар бар. Мерейтойлық концерт бағдарламасында кеш қонақтары ретінде: Санджай Әлмішев - «Құрмет» орденінің иегері (Астана қ.). Азамат Бакия - халықаралық және республикалық байқаулардың лауреаты (Астана қ.). Жұлдыз Мұқышова - халықаралық және республикалық байқаулардың лауреаты (Көкшетау қ.) өнер көрсетеді.