МЮЗИКЛ ӘЛЕМІНЕ САЯХАТ

«ASTANA MUSICAL» мемлекеттік мюзикл театры он жылға жуық уақыт ішінде батыл идеяларымен, жарқын қойылымдарымен ерекшеленіп, заманауи өнердің символына айналды.

Театр репертуарында «Астана - менің махаббатым», «Достар серті» спектакльдері, балаларға арналған «Ер Төстік» ертегісі, «Жырлайды жүрек», «Мен сағындым...» поэтикалық спектакльдері, «Қыз Жібек» этно-фольклорлық мюзиклі, Рэй Кунидің әйгілі «№13» комедиясы, «Шаңырақ» эксперименталды музыкалық перформанс, «Сиқырлы сазды хор-концерт», «Сынақ» драмасы, «COVID-19» перформансы, «Роза Бағланова» және «Алдар көсе» қойылымдары бар. Әлемдік мюзиклдер «Ромео мен Джульетта» және «Notre Dame de Paris» спектакльдері алғаш рет қазақ тілінде ұсынылып, көрермен жүрегін жаулап алды. Халыққа ұнаған театр жобаларын шетел сарапшылары да жоғары бағалады.

«ASTANA MUSICAL» театры әлем елдерінің мәдени астаналарында өнер көрсетіп, халықаралық фестивальдерде үлкен табыстарға жетті. Мәселен, «Роза Бағланова» мюзиклі Оңтүстік Кореяда «Үздік халықаралық мюзикл» деп танылды.

Алда жаңа белес! «ASTANA MUSICAL» мемлекеттік мюзикл театры оныншы маусымдық кезеңді атап өту мерейтойына орай арнайы мерекелік кешке шақырады. Бұл кеш - өнер мерекесі, нағыз триумф!

Кеш барысында танымал мюзиклдерден таңдалып алынған ең үздік көріністер, сахна шеберлерінің қатысуымен өтетін ерекше қойылымдар, керемет хореографиялар мен естен кетпес музыкалық тосынсыйлар ұсынылады. Атап айтқанда, көрермен «Достар серті», «Роза Бағланова», «Алдар көсе» және т.б. қойылымдардың ең әсерлі сәттерін тамашалай алады.

Салтанатты шарада танымал кейіпкерлер қайта сахнаға оралып, өз өнерлерін жаңа қырынан паш етеді. Театр ұжымы өнер мерекесін сізбен бөлісуге және жаңа белестің басталу сәтін бірге қарсы алуға дайын. Әсерлі кешті өткізіп алмаңыз!