«Ғасырлар үні - классика» концерті

ҒАСЫРЛАР ҮНІ

Классикалық музыка кеші филармония сахнасында тыңдарман жүрегін нұрға, әуезге толтырып, өнерге деген сүйіспеншілікті арттыра түседі. Бұл кеште көрермендер ұлы композиторлардың шығармаларын эстрадалық-симфониялық оркестрдің жанды орындауында тамашалайды.

· Рихард Штраус - неміс композиторы, кеш романтизм дәуірінің өкілі, неміс экспрессионизмінің жарқын тұлғасы. Симфониялық поэмалары мен опералары арқылы ерекше танымал болған.

· Франц Петер Шуберт - австриялық композитор, музыкалық романтизмнің негізін қалаушылардың бірі. Ол 602 вокалдық шығарма, тоғыз симфония, көптеген камералық және фортепианолық туындылардың авторы. Шуберттің мұрасы - романтизм дәуірінің ең озық үлгілерінің бірі.

Концерттің екінші бөлімінде кеңестік классика әуесқойларын қуантатын шығармалар шырқалады. Бағдарламада Арам Хачатурян мен басқа да танымал композиторлардың туындылары орындалады.

Кештің құрметті қонағы - Петропавл филармониясының сахнасына қайта оралған Ренат Салаватович Салаватов.

Ренат Салаватович Салаватов - кеңес дәуірінің дирижері әрі композиторы, Татар КСР-інің халық әртісі, Қазақстанның еңбек сіңірген қайраткері, Ресейдің еңбек сіңірген әртісі, Г.Тукай атындағы Татарстан Мемлекеттік сыйлығының лауреаты, Құрманғазы атындағы Ұлттық консерваторияның құрметті профессоры.

Классикалық музыка кеші әр жастағы көрерменді бей-жай қалдырмайды. Қанша уақыт өтсе де, өз мәнін жоғалтпайтын жауһарларды жанды орындауда тыңдаудың бірегей мүмкіндігі.